روتين العناية بالبشرة قبل العيد

ازيكوا يا بنات

انهردا هنتكلم على روتين كامل للعنايه ببشرة الوجه 

بمكونات سهله وطبيعيه موجوده في البيت وبأقل التكاليف 

علشان تدخلي العيد ببشره صافيه خاليه من العيوب 

خلينا متفقين ان جسمك هو أساس كل حاجه سوا شعرك او بشرتك 

مينفعش طبعا يبقا الأساس مش صحي وضعيف ونبقا عايزين نتيجه مبهره 

الروتين الي هنعمله ده هيديكي نتيجه فوريه 

بس علشان نحافظ على النتيجه يبقا لازم نهتم بجسمنا من الداخل الأول 

يعني نأكل اكل صحي وكمان نشرب مايه كتير

 وهنزلكوا موضوع مفصل عن الاهتمام بالجسم

 ونظام غذائي صحي يساعدك على الحصول على جسم رشيق وكمان بشره صافيه وصحيه 

ودلوقتي يلا نبدأ 

اول حاجه سوا غسلتي وشك او لا الي هنعمله دلوقتي هينضف بشرتك كويس جدا 

هنجيب طبق كبير

ونحط فيه مايه مغليه وهنضيف للمايه دي نعناع 

لان النعناع بيفتح المسام وينضفها وبيعمل انتعاش رهيب

ممكن تحطي اي أعشاب تانيه بتحبيها بس انا بفضل النعناع حلو جدا ومتوفر عندنا كلنا لو عندك جهاز البخار ممكن تعمليه فيه وتحطي في المايه نعناع برضو المتوفر والاسهل ليكي اعمليه

بعد كده هتحطي وشك فوق الطبق وتغطي نفسك بفوطه او اي حاجه تمنع خروج البخار زي في الصوره علشان وشك يستفيد بكل البخار الموجود

 هتخلي وشك في البخار لمده ١٠ دقايق او لحد ما البخار يقل خالص 

تاني حاجه هتجيبي قطنه وتمسحي بيها وشك هتلاقي كل حاجه طلعت في القطنه ووشك نضف جدا والقطنه مبتكدبش 😂

تالت حاجه ودي خطوه مهمه جدا هنعمل تقشير او اسكرب للبشره وبرضو مكونات عندك في البيت 

هنجيب ٢م كبيره سكر 

١م كبيره زيت جوز هند او زيت زيتون 

نصف لمونه 

م صغيره عسل

وممكن نضيف م صغيره بن اذا امكن لو معندكيش مش مشكله 

هنخلط المكونات كلها في بعض لو حسيتي ان الخليط أصبح سائل زياده عن اللزوم ممكن نضيف شويه سكر لحد ما نحصل على مزيج حوبيبي زي الصوره كده 

وهنبدا نفرده على الوش كله ونفركه في حركات دائريه بلطف

 ومش لازم تضغطي جامد علشان بشرتك متلتهبش ونسيبه ١٠ دقايق برضو وقبل ما نغسله هنفركه تاني وبعدين نغسله

بعد ما خلصنا وغسلنا وشنا كويس جدا هنيجي للخطوه الي بعد كده 

دلوقتي احنا نضفنا البشره كويس جدا لازم بقا نغذيها 

هنعمل دلوقتي ماسك حلو جدا بيفتح البشره ويرطبها وكمان بيقضي على الحبوب والبقع الداكنه

هنجيب م كبيره نشأ 

م كبيره لبن 

م صغيره مايه ورد 

هنخلط المكونات كلها مع بعض لحد ما نحصل على خليط متجانس خفيف 

هنفرد الخليط على البشره ونسيبه لمده ١٥ دقيقه

بعد كده ودي آخر مرحله هنغسل وشنا باي غسول بتستخدميه انا عن نفسي بستخدم بيور سكين من اوريفلام 

او غسول ستار فيل حلو جدا للبشره الدهنيه وللحبوب

 بعد كده هنرطب بشرتنا باي كريم مرطب بتستخدميه انا بستخدم نيفيا سوفت 

لو معنديش مفيش مشكله ممكن تستخدمي مايه ورد كتونر حلوه جدا وهترطب الوش وتقفل المسام علشان بشرتك متمتصش الاتربه الي في الجو 

وبكده نكون خلصنا اتمنى تكونوا استفدتوا 

Love you banotaty ❤️❤️