طريقة عمل كورات الشيكولاتة

ازيكم يا حلوين 

انهارده جبتلكم وصفه خطيررره بجد

هتحبوها جدا لأنها سهله وسريعه وكمان مكوناتها موجوده في كل بيت 

خلينا نبدأ الوصفه الي هنعملها انهارده وصفه كورات الشيكولاته او دونت محشي شيكولاته

شايفين حلوه ازاي ومكوناتها كمان سهله جداً كل الي هنحتاجه 

٢ كوب دقيق 

كوب لبن 

١ م كبيره خميره فوريه

١ م كبيره سكر 

رشه ملح 

١ م صغيره فانيليا 

هنخلط المكونات الصلبه كلها مع بعض كويس زي الصوره 

وبعدين هنبدأ ننزل باللبن تدريجي ونعجن كويس لحد ما نحصل على عجينه طريه كده 

لو حسيتي ان اللبن زاد معاكي والعجينه بتلزق ممكن تزودي دقيق او لو حسيتي العجينه نشفت هنزود لبن على حسب احتياجك المهم نوصل لعجينه طريه مبتلزقش ولا نشفه 

وبعد كده هنغطي العجينه ونسيبها تخمر نص ساعه ونرجعلها تاني 

بعد كده هنقسمها لكور صغيره بالحجم الي احنا عايزين بس اعملي في حسابك انها لما بتتقلي بتكبر تمام وبعد ما نكورها لكور صغيره هنحشي كل كوره بالحشو الي عيزاه ممكن تحشيها حشو حلو زي شيكولاتة ممكن نستخدم نوتيلا او شيكولاتة مكعبات كادبري او اي نوع تحبي وممكن نحط فاكهه او مربي برحتك خالص 

وممكن تحشيها حشو حادق زي اي نوع جبنه وبرضو بتبقا تحفه 

وبعد كده هنبدأ نقليها في الزيت على درجه حراره متوسطه ولازم الزيت يكون مغطيها علشان تستوي كلها هتطلع معاكي بالشكل ده 

طريه والشيكولاتة سايحه جواها وممكن ترشي عليها سكر بدره او صوص شيكولاتة او شربات زي ما تفضلي انتي 

وبالف هنا وشفا 😍😍